Kalluun dhif iyo naadir ah oo leh ilko u ek kuwa bani’aadanka ayaa lagu qabtay magaalo ka tirsan dalka Mareykanka.
Sawir laga soo qaaday kalluunkaas ayaa isbuucan lasoo galiyay barta bulshada ee Facebook, halkaas oo si weyn loogu hadal hayay.
Markii ugu horreysay waxaa sawirka lasoo dhigay bogga Jennette’s Pier, oo ah shirkad kalluumeysiga ka shaqeysa oo ku taalla gobolka North Carolina.
Waxaa kalluunkan lagu sheegay inuu yahay midka afka qalaad loogu yaqaanno “sheepshead”. Afkiisa qaybta hoose waxaa ku yaalla dhowr saf oo ilko ah, kuwaasoo uu ku ruugo raashinka.
Magaca kalluunkan ayaa la aaminsan yahay inuu asal ahaan ugu baxay maadaama uu afkiisa u egyahay midka idaha.
Kalluunkan ayaa la rumeysan yahay inuu soo dabay Nathan Martin, oo si joogto ah ula shaqeeya shirkadda kalluumeysiga.
Mr Martin ayaa sheegay in uu rajeynayay inuu qabto kalluunka madaxa idaha leh kaddib markii uu si toos ah u arkay “af ay ilko ka buuxaan”.
“Waa dagaal aad u wanaagsan marka aad ku dagaallameyso safka, runtii waxay ahayd kalluun dabid fiican, aad baana uga helay,” ayuu ku yiri warbaahinta McClatchy News.
Sawirka lasoo dhigay Facebook – oo lagu dul qoray hashtag #bigteethbigtimes – ayaa kiciyay hadal heyn aad u weyn.
“ilkaha macmalka ah ee la gishto ma halkan ayay ka imaadaan?” ayuu yidhi qof faallo ku qoray halkaas.
“Kalluunkaas wuxuu leeyahay ilko ka fiican kuweyga,” ayuu qoray qof kale.
Qof kalena wuxuu qoray: “Waxaan aqaannaa dad jeclaan lahaa inay ilkaha sidaas u badan yeeshaan”.
Kalluunka noocan ah ayaa sida caadiga ah laga helaa biyaha u dhow dhagaxyada (jamalka), meelaha ay doomaha ku xirtaan iyo xitaa buundooyinka agtooda.
Waxaa kale oo dadka qaarkood ee Mareykanka ku nool ay ku magacaabaan “kalluunka dambiilaha ah” iyagoo magacaas ugu bixiyay maqaarkiisa diillimaha madowga iyo caddaanka ee u eg dharka ay xirtaan maxaabiistala xukumay ee Mareykanka.
Mas’uuliyiinta maamulka gobolka North Carolina ayaa warbaahinta u sheegay in qabashada kalluunkan ay aad iyo aad u adag tahay. Laakiin waxay intaas ku dareen in hilibkiisa uu aad u macaan yahay.
