Twitter ayaa muddo 12 saacadood ah ka mamnuucday inuu barta wax ku daabacao curadka madaxweyne Trump.
Ciqaabtan ayaa timid ka dib markii wiilka Donald Trump uu barta ku daabacay muuqaal looga hadlayo faa’iidooyinka dawada Hydroxychloroquine.
Dadka qaar oo uu ka mid yahay madaxweyne Trump ayaa soo jeediyay in dawada ay wax ka tareeyso fayraska corona inkastoo baaritaannada dhanka caafimaadka ay naqdiyeen soo jeedintaasi. Barta Twitter ayaa sheegtay in muuqaalkiisa uu ku xad-gudbayo sharciyada la xiriira wararka been abuurka ah xanuunka Covid-19.
Donald Trump Jr ayaa weli loo ogol yahay inuu isticmaalo barta uuna farrimaha gaarka ah u diro macaamiishiisa balse barta waxba kuma baahin karo.
Twitter ayaa BBC-da u sheegtay: “Waxaan sameeyneynaa ficil la xiriira siyaasadeheena barta.”
Dhammaan baraha caanka ah ee ay bulshadu ku wada xiriirto ayaa qaaday tallaabo lagula dagaalamayo wararka been abuurka ee coronavirus.
Andy Surabian, oo ah afhayeen u hadlay wiilka Donald Trump ayaa BBC-da u sheegay in go’aankaasi uu yahay “mid lagu deg-degay”
“Twitter waxa uu muddo kooban ka mamnuucay Donald Jr inuu barta wax ku daabaco taasi waxay muujineysaa in barta ay cadeyneyso iney dileyso xornimada hadalka ee Online-ka, sidoo kale waxay tallaabadani daliil u tahay in barta Twitter ay isku howleyso faragelinta doorashada si ay u caburiso codadka xisbiga Republican-ka,” ayuu yiri.
Madaxweynaha Mareykanka Donald Trump ayaa horay u sheegay in uu liqay dawada looga hortago cudurka duumada ama malaariyada ee hydroxychloroquine.
Trump wuxuu sheegay in dawadan uu ugu talagalay in uu isaga difaaco fayraska Covid-19, in kastoo seynisyahannada ay ka digayaan dhibaatada ka dhalan karta.
Maxaan ka naqaannaa dawooyinkan?
Mr Trump wuxuu marar badan “wax tarka ay dawadan u leedahay coronavirus” ku sheegay shirarka jaraa’id ee uu ku qabanayay Aqalka Cad, wuxuuna yiri: “Maxay kaa dhibeysaa? isticmaal.”
Madaxweynaha Brazil Jair Bolsonaro ayaa isagana sheegay in dawada loo adeegsado Malaariyada ay meel kasta ka shaqeyneyso, inkastoo hadalkaas ay shirkadda Facebook meesha ka saartay, maadaama ay sheegtay inuu hareer marayo sharciga ay kula dagaallameyso faafinta xogta marin habaabinta ah.
Wixii ka dambeeyay hadalkii uu madaxweyne Trump arrintaas ku sheegay dabayaaqadii bishii March, waxaa jiray sare u kac weyn oo lagu soo warramay inuu ku yimid isticmaalka dawada malaariyada ee gudaha Mareykanka, inkastoo dalabkaas uu markii dambe hoos u dhacay.
Kaniinnada ka sameysan maaddada chloroquine-ta waxaa muddo dheer loo isticmaalayay in lagu daweeyo xanuunka ay kaneecada sababto ee malaariyada, si loogu dhimo qandhada iyo kuleyka xad-dhaafka ah, rajaduna waxay tahay inay dawaasi sidoo kale ula tacaali karto faraska dhaliya cudurka Covid-19.
Ma jirto caddeyn ku filan oo lagu helay tijaabooyinka ilaa hadda lagu sameeyay waxtarka kaniinnadaas iyo sida ay u caawin karaan bukaannada qaba coronavirus.
Waxaa kale oo jirta khatar weyn oo ku saabsan inay waxyeello sababi karaan, waxaana ka mid ah dhaawacyo soo gaari kara kalyaha iyo beerka.
“Waxaan u baahan nahay tijaabooyin caafimaad oo waaweyn si aan cabir sax ah ugu sameyno saameynta ka imaan karta,” ayuu yiri Kome Gbinigie, oo ah qoraaga daraasadaha ku saabsan Covid-19 ee Jaamacadda Oxford.
In ka badan 20 tijaabo ayaa la sameeyay. Meelaha laga sameeyay waxaa ka mid ah Mareykanka, UK, Spain iyo Shiinaha.
Dalka Mareykanka tijaabooyin badan ayaa ka socda si loo ogaado wax tarka dawooyin la isku daray oo ay ku jiraan hydroxychloroquine iyo qallajiyeyaal lagu magacaabo azithromycin, kuwaasoo la eegayo inay daweyn karaan bukaannada Covid-19.