Toddobaadadii u danbeeyey waxa baraha bulshada adduunka gaar ahaan barta lagu magacaabo TikTok ku baahday heesta Soomaaliga ee ay qaaddo fannaanada Nimco Happy ee ‘Isii Nafta’.
Heestan ayaa waxaa sii baahiyay isla mar ahaantaana isku soo dul duubeen dad badan oo ku kala daafaha caalamka, kuwaas oo kaalin lixaad leh ka qaatay in heesta ay sii baahdo, islamarkaasina soo jiidato dadka oo iyaga ku xiran.
Dadkaas waxaa ka mid ah shakhsiyaad keliya aanan caan ahayn, balse sidoo kale leh taageerayaal aad u badan, dunida horumartayna ka ah xiddigo maamuuskoodu sareeyo, kuwaas oo wixii ay gacanta saaraan uu dahab isu badelo.
Trevor Noah
Trevor Noah ayaa u dhashay Koonfur Afrika, waana majaajiliiste iyo barnaamij soo saare ku caan ah falanqayn siyaasadda, hab maad iyo qosol leh sida oo kalena waa qoraa.
Trevor, ayaa soo saara barnaamijka Daily Show oo caan ka ah dalka Maraykanka, kaas oo lagu maadaysto arrimaha siyaasadda.
Waxa uu hadda ku ku nool yahay dalka Maraykanka, waxaana barnaamijyadiisa ku taxan dad aad u badan oo isugu jira siyaasiyiin, mas’uuliyiin dowladeed, dublamaasiyiin iyo dad caadi ahba. Waxa uu hibo sare u leeyahay in uu dadka ka qososhiiyo.
Dhawaan ayuu isku dul duubay heesta Nimco Happy, isaga oo soo raaciyey farriin kaftan oo uu leeyahay
“Marka qofka uu ku faraxsanyahay in uu xafiiska kusoo laabto”.
Cardi B
Dadka kale ee iskusoo dul duubay heesta Nimco Happy ee ‘Isii Nafta’, waxaa ka mid ah fannaanada caanka ah ee Cardi B.
Belcalis Marlenis Almánzar, waa fannaanad qaadda heesaha loo yaqaan ‘rap-ka’ waxa ayna u dhalatay dalka Maraykanka.
Waxaana loo tixgeliyaa mid ah haweenka heesa kuwooda ugu caansan qarnigan.
Cardi B, oo ku leh baraha bulshada bogag ay la socda dad kor u dhaafaya malaayiin qof ayaa boggeeda Instagram iyo kuweeda kaleba ku soo baahisay heestan.
Iyada oo ay wada jilayaan gabdho ah oo iyana caan.
Chunkz
Amin Mohammed oo loo yaqaan Chunkz, ayaa ka mid ah isaguna dadka caanka ah ee iskusoo dul duubay heesta Nimco Happy ee baraha bulshada qabsatay.
Chunkz, ayaa YouTuber caan ah oo fadhigiisu yahay dalka Ingiriiska.
Asal ahaan waa Soomaali, waxa si weyn looga dhex yaqaan carriga UK.
Wuxu soo saaraa barnaamijyo lagu waraysto ciyaaryahannada caanka ah ee Kubadda Cagta, isaga sida oo kalena daadihaya xafladaha waaweyn ee dalka Ingriiska.
Waxaana uu baraha bulshada ku haystaa taageerayaal kor dhaafaya afar milyan.
Bella Hadid
Isabella Khair Hadid, ayaa iyana ka mid ah shakhsiyaadka caanka e heestan qaybta ka noqday faafitaankeedii degdegga ahaa.
Belle, oo gabadh dharka xayaysiisa oo ku guulaysatay billado badan oo ay ka mid tahay “Model of the Year” oo ah abaalmarin ay dadku u codeeyaan.
Ma ahan oo keliya dadkan, shakhsiyaad kale oo Soomaali ah bogagga bulshada ku haysta asxaab farabadan ayaa ka mid heestaa sida weyn u sii baahiyey, xilli ayba noqotay mid ka mid heesaha ugu caan adduunka.
Tan iyo markii ay si lama filaan ah cirka isugu shareertay heesta lagu naaneyso “I Love You More Than My Life” ee ay qaadday fannaanadda Nimco Happy, waxaa isasoo tarayay sheekooyinka ku saabsan sida loo xiisaynayo heestaas oo ka kooban dhowr luqadood oo kala ah Soomaali, Carabi, Ingiriis iyo Sawaaxili.
Waxaa lasoo tabiyay in Nimco Happy ay xidhiidho badan lasoo sameeyeen shirkado waaweyn oo caalami ah, oo ay ka mid tahay Polydor Records.
Polydor Records Ltd. waa shirkad laga leeyahay waddamada Jarmalka iyo Ingiriiska oo qayb ka mid shaqadeeda ay tahay howlaha la xiriira muusiga caalamiga ah. Waxay xiriir la leedahay shirkado badan oo qaabilsan diiwaan galinta fannaaniinta iyo fanka caan baxay.
Heestan ayaa sida oo kale laga dhegaysan karaa barta ku caan baxday muusigga ee Spotify