Gobolka Minnesota ee dalka Mareykanka oo ay Soomaali fara badan deggan tahay ayaa laga soo sheegayaa in dhaca baabuurta ay aad u korortay. Maamulka degmada Hennepin ayaa shalay labo qof oo dembi oogayaal ah u magacaabay inay arrimahaas wax ka qabtaan.
Magaaladda Ganacsiga ee Minneapolis ayaa tan iyo markii sanadkii hore ay askartu ku dileen George Floyd oo nin madow ahaa ayaa ammaanku faraha ka sii baxaayey, iyadoo tirada askartuna ay aad u yaraatay.
Magaalooyinka mataanaha ah ee Minneapolis iyo St. Paul ayaa waxaa aad u kordhayay afduubka gawaarida, taas oo dadka ay saameynta ku yeelatay ay ka mid yihiin Soomaali.
Ku dhowaad 600 oo gawaari ah ayaa la dhacay sanadkan dhexdiisa, marka loo barbardhigo sanadkii hore ee 2020 oo baabuurta la dhacay ay ahaayeen 240.
Dhibbanayaasha qaarkood ayaa sheegay in dharaar cad laga dhacay gaarigooda, dadka qaarna waxaa ku adkaatay inay dukaameystaan amaba ay danahooda kale magaaada ka soo qabsadaan, sida uu sheegay Xeer Ilaaliyaha degmada Hennepin Mike Freeman.
Labada dacwad-ooge ayaa waxaa loo dhiibay shaqooyin u gaar ah, midkood ayaa qaabilsanaan doonaa arrimaha dhalinyarada ay da’doodu ka yar tahay 21-jirka, halka midka kalena uu dadka waaweyn qaabilsanaan doono, iyadoo dembiyadana loo kala saari doono gaari meel yaalla oo la xaday iyo mid qofka wata laga dhacay.
“Waa go’aan wax looga qaban karo aan is leeyahay dadka inta badan dembiyada geysta,” ayuu yiri Cabdiraxmaan Mukhtaar oo ka mid ah dadka u dhaqdhaqaaqa arrimaha dhalinyarada Minnesota.
“Marka la xiro ama dacwaddii lagu soo oogay la qabto waa la soo daayaa, damaanad ayaa lagu sii daayaa, maaddaama uu dembigu yahay dembi baabuur dhicitaan ah bannaanka ayay istaagayaan ilaa ay maxkamad dambe ka imaanayaan, oo dacwadda iyo kiiska si dhab ah loo galayo, taas oo keeneysa inay sii wataan dembiyadii dhaca,” ayuu yiri.
Soomaali badan oo deggan Minnesota ayaa la kulmay dhac, waxaana ka mid ah Deeqa Warsame iyo wiilkeeda oo dhowaan gaarigoodii laga dhacay, waxay sheegtay inay nafteeda halis gelisay kaddib markii ay eryatay ninkii gaariga ka faro maroojiyay.
“Booliiska waxaan ku iri gaariga noo raadiya, haye ayay dhaheen, isla markiiba gaarigii oo nin madow uu wato ayaa iga hor yimid, kaddib booliiska way naga tageen aniga ayaa ka daba laabtay, wuxuu ila galay xarun shidaal markaas gaariga iga deg ayaan ku iri oo aan la qabsaday. Annagu Soomaali ayaan nahay oo waan iska calool adagnahay cabsidiiba way iga tagtay oo xabaddii iyo wuxuu heysataba waan iska illaaway,”
“Marka gaarigana gaari cusub ayuu ahaaye waan ka samri waayay, waan kula dhegay wuu ila raftay, wuu i jiirsiin gaaray, wuu booday oo baabuur ayuu baabi’in gaaray halkaas ayuuna ka baxay. Kaddib waxaa dhacday booliiska ayaan u yeernay oo ku niri ninka sawirkiisa waa kan halkaan ayaan hadda ku qabannay, kaamirada ayay fiiriyeen waxayna yiraahdeen maxaad noloshaada ugu khamaartay ninkan waa burcad hadduu doono wuu hubeysan yahay, waxaan iri naftu saacad ayay leedahay annaguna waxaan ognahay inaadan ka dambeyneyn kana horreyneyn oo Muslim baan nahay, ee gaariga ma iiga soo qaadeysaan mise anigaa ka soo qaata?” ayay tiri Deeqa.
Deeqa ayaa sheegtay in dhowr maalmood ay is cayrsanayeen ninka gaariga ka dhacay, isla markaana ay booliiska wax ka qaban waayeen.
“Dhowr maalmood oo aay cayrsanayay kaddib ayaa ninkii wuxuu arkay inuu shidaalka ka sii go’ayo, gaariga meel ayuu ku leexiyay halkaas ayuuna uga tagay, anigana kaddib booliiska ayaan u wacay oo halkii iigu yimid sidaas ayaana taagireyga ku soo dhacsaday.” Ayay tiri Deeqa.