Sida ay sheegayaan wararka na soo gaaraya wadanka Ciraaq ra’iisulwasaaraha wadankaas ayaa ceyriyay safiirka dawladda Sweden u fadhiyay wadankiisa kadib markii mar labaad uu nin kale gudaha Sweden kula xadgudbay Quraanka.

War ka soo baxay dawladda ayaa lagu sheegay in Baghdad ay sidoo kale u yeeratay safiirkeedi fadhiyay Sweden.

Wakaalada wararka Ciraaq ayaa sheegtay in dawladdu ay ka mamnuucday in Sweden ay cagaha soo dhigto dalka Ciraaq.

Xaafadda Islii ee magaalada Nairobi, waxaa maanta inta badan xiran suuqyada ganacsiga,iyadoo wararku ay sheegayan in la arkayo qaybo yar oo suuqyada ka mid ah oo furan.

Waddooyinka ayaa haawanaya waxaana aad u yar socodka dadweynaha maadama guudahaan Kenya maanta laga cabsi qabo dibadbaxyo rabshado wata in ay dhacaan.

Qaybo badan oo ka mid ah Islii waxaa la geeyay ciidamo badan oo ah kuwa ka hortaga rabshadaha, waxaana sidoo kale xiran iskuullada iyo dugsiyada qur’aanka.

Cumar Ibraahim Xuseen oo ka tirsan guddiga ganacsatada Islii ayaa BBC-da u sheegay in xaafadda laga dareemayo cabsi la xiriirta waxa dhici doona haddii ay dibadbaxyadu soo gaaraan.

Hogaanka SSC Khaatumo oo ka warbixiyey jabkii ay maanta gaarsiiyeen Maleeshiyadda Maamulka Hargeysa.

Maleeshiyada maamulka SNM ayaa maanta weerar ku soo qaaday aagag ka mid ah difaacyada Jamaahiirta SSC, kuwaas kala hortegay difaac xoogan oo dib ugu celiyeeen godadkii Goojacade ee ay ku dhuumaaleysan jireen.

Weli wax war ahi kama soo bixin khasaaraha dagaalka ee labada dhinac kala gaaray.

Guddiga Komishinka Doorashooyinka Somaliland ayaa goordhoweyd soo saaray jadwalka doorashooyinka muranka uu hareeyay ee muddooyinkii dambe isku hayeen xukuumadda Muuse Biixi iyo mucaaradka.

Guddiga Doorashooyinka ayaa waxaa uu shaaciyay in doorashada Xisbiyada Qaranka la qabanayo 28-ka December ee sanadkaan 2023-ka, “si loo helo saddex xisbi qaran oo ansaxsan lana siiyo shahaadada xisbino ee tobanka sano, KDQ uu muddadaas ka horaysa ku dhameystiro wixii farsamo ah.”

Sidoo kale waxa uu guddiga ku dhawaaqay in doorashada Madaxweynaha iyo Ku-xigeenka Madaxweynaha la qaban doono 13-ka November 2024-ka, taasi oo ka dhigan in muddo kordhintii Golaha Guurtida u sameysay uu dhameysanayo madaxweyne Muuse Biixi Cabdi.

“Komishabka Doorashooyinka Qaranka JSL wuxuu ka codsanayaa Golahaasha Sharci-dejinta inay dhameystiraan qabyooyiinka sharci ee doorashooyinka,” ayaa lagu yiri qoraal kasoo baxay Guddiga Komishinka Doorashooyinka Somaliland.

Guddiga ayaa sidoo kale waxa uu ka dalbaday dhamaan daneeyayaasha caalamiga ah ee doorashooyinka in ay kala shaqeeyaan fududeynta wixii farsamo ah ee la xidhiidha qabsoomida doorashooyinka, si aysan uga dib dhicin jadwalka uu soo saaray.

“Guddiga markii uu garwaaqsaday hanaanka Xisbiyada baddani saldhig u yahay nidaamka siyaasadeed ee Jamhuuriyadda Somaliland, tirada xisbiyada siyaasiga ahna aanay ka badnaan karin saddex xisbi sida ku xusan qodobka 9-aad faqradiisa 1-aad iyo 2-aad ee Dastuurka JSL,” ayuu guddiga ku sheegay sababaha kala horeysiinta labada doorasho ee la isku hayay.

Jadwalka doorasho ee uu soo saaray guddiga doorashooyinka Somaliland ayaa uga soo daraya xiisadda siyaasadeed ee ka taagneyd gudaha Somaliland, taasi oo salka ku haysay kala horeynta labada doorasho ee Madaxtooyada iyo Xisbiyada.

Mucaaradka ayaa horay si adag uga horyimid in lasoo hormariyo doorashada Xisbiyada, ayna tahay in marka hore loo dareero doorashada Madaxtooyada, halka uu taasi badelkeeda ay u ololeynaysay xukuumadda Muuse Biixi, taasi oo ugu dambeyntiina sida muuqata u meel-martay.

Dhulgariir lagu qiyaasay 7.4 Richter Scale ayaa ku dhuftay xeebaha gobolka Alaska ee dalka Mareykanka, iyadoo laga digayo sunaami.

Cabirka dhul gariirku waxa uu ahaa 7.4. Dhul-gariirkan ayaa waxa xigay waxaana xigay dhulgariirro yar-yar.

Digniin sunaami ah ayaa la soo saaray inta badan Jasiiradda Alaska.

Ra’iisul wasaarayaasha dalalka Talyaaniga iyo Holland, iyo guddoomiyaha guddiga Yurub, ayaa maanta ku sugan dalka Tunisia, iyagoo isku dayaya inay dib u bilaabaan wadahadal ku saabsan joojinta dadka tahriibka, ee ka gudbaya badda Mediterranean-ka.

Georgia Meloni, Mark Rutte, iyo Ursula von der Leyen, ayaa la kulmi doona madaxweynaha dalka Tunisia, Kais Saied.

Waxa ay isku dayayaan inay heshiis ka gaaraan in Tunisia la siiyo in ka badan hal bilyan oo doollar, si ay u soo rogaan kontaroolada xuduudaha.

Maamulka Tunisia, ayaa lagu eedeeyay inay si xun ula dhaqmeen dadka tahriibayaasha ah, oo ay kamid tahay inay ka saareen magaalada Sfax, kadibna ay ka tageen iyaga oo aan haysan cunto iyo biyo.

(Qaramada Midoobay ayaa waxay sheegtay in ku dhawaad ​​saddex boqol oo caruur ah ay dhinteen, iyagoo isku dayaya inay ka gudbaan badda Mediterranean-ka, si ay ugu gudbaan qaaradda Yurub sanadkan.)

Ra’isul Wasaaraha Israel Benjamin Netanyahu ayaa isbitaalka loola cararay, isaga oo baaritaan caafimaad ku maray Isbitaalka Sheba ee magaalada Tel Hashomer, Sabtida maanta ah.

Mas’uuliyiinta Israel aya sheegay in xaaladdiisa ay wanaagsan tahay, sida uu sheegay xafiiskiisa, iyada oo aysan jirin wax calaamado ah oo muujinaya suurtagalnimada inuu xilka wareejiyo.

Waxaa la dhigay qolka gargaarka degdegga ah ee Isbitaalka Sheba ee magaalada Tel Hashomer, sida uu sheegay TV-ga Channel 12 ee Israa’iil.

Netanyahu, oo 73 jir ah, oo ah hoggaamiyihii ugu muddada dheeraa dalkaas, ayaa ka cabanaya xanuun feeraha ah, in kasta oo uu si buuxda u joogo miyirkiisu.

War kooban oo ka soo baxay xafiiskiisa ayaa lagu xaqiijiyay inuu ku sugan yahay Isbitaalka Sheba, waxaana lagu sheegay in xaaladiisa ay wanaagsan tahay oo uu ku marayo qiimeyn caafimaad.

Ilaa hadda ma cadda cidda bedeli karta haddii ay dhacdo xaalad degdeg ah, oo keeni karta inuu gudan waayo waajibaadkiisa. 

Horraantii bishii Oktoobar, ayuu xanuunsaday xilli ay Yuhuuddu soomanayeen Yom Kippur, waxaana muddo kooban la dhigay cusbitaalka.

Israa’iil ayaa ku jirtay toddobaadkan maalmo aad u kulul.

Digniin ayaa laga soo saaray 16 magaalo oo ku yaalla dalka Talyaaniga oo kuleyl aad u daran ka jiro iyadoo kulaylka uu weli saameynayo koonfurta Yurub.

Dawladda Talyaanigu waxay kula talisay cid kasta oo ku sugan meelaha ay khusayso digniinta la soo saaray inay ka fogaadaan iftiinka qorraxda tooska ah inta u dhaxaysa 11:00 iyo 18:00, si gaar ahna u daryeelaan waayeelka iyo kuwa jilicsan.

Kulaylka ayaa socda muddo ka badan sidii caadiga ahayd ee horay looga bartay, heerkulka habeenkiina waa mid aad u sareeya.

Toddobaadka soo socda waxaa Yurub laga filayaa in heerkulka uu aad u kaco.

Hay’adda Caafimaadka Adduunka (WHO) ayaa sheegtay, inay ka xun tahay isla markaana ay cambaaraynayso weerarkii ugu dambeeyay ee lagu qaaday xarun caafimaad oo ku taala magaalada Laascaanood, 11kii bishan July 2023, sida ay hadalka u dhigeen.

Tedros adhenom, madaxa hay’addaas ayaa qoraal uu ku soo qoray barta twitterka ku sheegay in weerarkaasi uu sababay tobanaan dhimasho iyo dhaawac ah – oo ay ku jiraan shaqaalaha daryeelka caafimaadka iyo bukaanadii cisbitaalkaas.

Jamhuuriyadda gooni isu taageeda ku dhawaaqday ee Somaliland ayaa dhankeeda dhowr jeer sheegtay in aanay iyadu beegsan goobaha caafimaadka, xilli muddooyinkii u danbeeyey uu dagaal ka socday magaaladaasi Laascaanood.