Ugu yaraan 38 Tahriibayaal Itoobiyaan ah oo ay ku jiraan caruur ayaa ku dhintay kadib markii dooni ay la socdeen ay kula qalibantay meel u dhow xeebaha dalka Jabuuti. Lix qof oo kale ayaa la la’yahay oo loo malaynayo inay dhinteen. Itoobiya ayaa sheegtay in ay aad uga xuntahay masiibadan.
Sida uu kusoo waramayo Weriyaha BBC Kalkidan Yibeltal.
Doonta ayaa siday in ka badan lixdan qof oo rakaab ah, waxayna kusii jeedday dalka Yemen, waxayna ku qalibantay meel ku dhow xeebta Godoria ee waqooyi bari dalka Jabuuti. Kaliya 22 ayaa ka badbaaday.
Qaramada Midoobay ayaa sheegtay in ilaa hadda la helay meydadka 38 qof. Sannad kasta kumannaan tahriibayaal Itoobiyaan ah ayaa isku daya inay gaadhaan dalalka saliidda qaniga ku ah ee bariga dhexe, iyagoo ka talaabaya gacanka cadmeed iyagoo rajo ka qaba inay helaan nolol wanaagsan.
Safaaradda Itoobiya ee Djibouti ayaa ku eedaysay kuwa sida sharcidarada ah wax u tahriibiya inay sabab u yihiin tirada badan ee dhalinyarada ka imanaya miyiga dalkaas ee doorta inay galaan safarro khatar ah.
Xogta laga helay Mashruuca Muhaajiriinta ee Qaramada Midoobay ayaa muujinaysa in ku dhawaad ​​kun qof ay dhinteen tobankii sano ee la soo dhaafay iyagoo isku dayayay wadadan.
