Madaxweynaha Somaliland Muuse Biixi Cabdi ayaa shalay ka hadlay dil macno daro ah oo ciidamada Somaliland beryihii u dambeeyey loo geysanayey, isagoo muujiyey inaanu garanayn sababta arintani u dhacayso, hanjabaad culusna raaciyey.

Dilka Askarigu waa arin xun oo nabadgelyo daro bilowgeed ah, waana ka tacsiyadeynaynaa, balse Madaxweyne waxaad ilowsan tahay inaad tahay Taliyaha Guud ee Ciidamada Somaliland, haddii hogaamintaadu wanaagsanaato waxaa kor u kacaya sharaftooda, hadaad hogaaminta ku fashilantidna waxaa khatar ku jira naftooda iyo nafta shacabkaba, Sidaasdaraadeed khaladku waa adiga oo hogaamintii dalka ku fashilmay, dhibaatooyinka goobaha Ciidanka lagu dilayo ka jirta waa masuuliyadaada inaad Caqli iyo salmi ku xalisid.

Askariga maanta dagaalka Caarre ku dhinta waxaad dishay maalintii Caarre oo keligiis ah oo naftii hayso, meel uu u kaco haysan aad diiday in odayaashiisu keenaan kuna tidhi waa arin Ciidan faraha ka qaada, HADDA MIYAANAY ARIN CIIDAN AHAYN MAXAAD ODAYAASHA UGU DIRAYSAA? MAAHA IN GIDAARKU KU SOO CESHADO EE WAA INAAD KA HORTAGTAA.

Madaxweyne dilka macdarada ah ee Ciidanka waxaa fududeeyey hogaamin xumadaada sida;

1.Markaad ku fashilantay inaad colaada Ceel Afweyn dhameyso.

2. Markaad ku guuldaraysatay in caqligu shaqeeyo oo shaqadii Caaqilka aad Ciidankii Qaranka u adeegsatay.

3. Markaad garanweyday dadka degaanka adeegso intaadan weerarka Tukaraq qaadin.

4. Markaad tanaasulkii baad u qaadatay.

5. Markaad gabtay inaad waxwalba waqtiga ku haboon xaliso, oo arin bilowgii 2000 oo dollar kugu tegi lahayd aad malaayiin isku gaarsiiso.

6. Markaad qiimeyn weyday taladdii iyo dareenkii shacabka.

7. Markaad Xukuumadaadii ku soo urursatay xubno majeedhaan ah oo aan talo kugu kordhin karin ama khaladka kaa qaban karin.

HALKAN KA AKHRISO QAAR KA MID AH GUULDAROOYINKA IYO FASHILKA MADAXWEYNE MUUSE BIIXI

GEBAGEBADDII MADAXWEYNE WAXAA HABOON INAAD XUSUUSNAATO INAAD TAHAY WAARDIYAHA ASKARIGA KA ILAALIYA KHATARAHA KU IMAAN KARAA, FASHILKAAGANA QIIL HOW SAMEYNIN, NABADGELYADA XOOG KELIYIHI MA KEENTO EE CAQLIGA OO LAGA SHAQAYSIIYO AYAA SALDHIG U AHAA.

Maxkamad ayaa maanta oo talaado ah magaalada London uga furmaysay Amiirka Dubai, Sheikh Mohammed bin Rashid Al Maktoum iyo xaaskiisa Amiirad Hayaa bintu Xuseen oo isku haysta labo carruur ah oo ay isu dhaleen.

Dacwaddan ayaa dhaawac ku ah Amiirkan maalqabeenka ah ee jecel in aan la ogaan arrimihiisa u gaarka ah isla markaasna neceb buuqa iyo is jiid jiidka, si la mid ah sida hoggaamiyeyaasha kale ee Khaliijka.

Saxaafadda Ingiriiska ayaa si gaar ah arrintan isha ugu haysay tan iyo markii ay soo shaac baxday,ayadoo saxaafadda Ingiriiskuna ay aad diiradda u saarto dabagalka wararka ku saabsan dadka caanka ah iyo kuwa maalqabeenka ah.

Warbaahinta ingiriiska ayaa sidaas si la mid ah u qaadaa dhigtay sheekada la xiriirta markii 19 sano ka hor gabadh uu dhalay Mohammed bin Rashid, oo la yiraahdo Shamsa ay isku dayday in ay kaga baxsato beertiisa ku taal Koonfuta Ingiriiska, laba bilood kaddibna arrintaasi way iska dhammaatay walina lama oga sida amiiraddan 38 jirka ah ay ku tagtay Dubai, walina gabadhaasi meel fagaare ah kama soo muuqan.

Waxaa sidaas si la mid ah sannadkii hore isku dayday in ay Dubai ka baxsato Amiirad Ladiifa oo walaasheed ah, balse dib ayaa loo soo celiyey kaddib markii ciidamada Imaaraadka ee sida gaarka ah u tababaran ay hawgal ku soo qabteen.

Warbaahinta Ingiriiska ayaa ogaatay in si weyn loo ilaaliyo xubnaha qoyska Sheekh Maxamed bin Raashid ee ku sugan Britain, marka ay guryahooda joogaan iyo markay bannaanka joogaanba ayagoo ilaalo la raaciyo marka ay ku sugan yihiin daaraha dhaadheer ee qoyskaasi ay ku leeyihiin England iyo Scotland.

Sheekha hoggaamiye dhaqameedka ah

Maxamed bin Raashid wuxuu sannadkii 1949-kii ku dhashay gobolka Shindagha ee Dubai, waana da’da saddexaad ee carruurta afarta ah ee uu dhalay Sheekh Raashid Bin Saciid.

Aabbihiis sheikh Rashid wuxuu xukunka imaaradda Dubai hayey intii u dhexaysay 1958 iyo 1990, waxaana imaaraddaas si gaar ah u ilaaliya Ingiriiska marka loo eego imaaradaha kale ee Khaliijka.

Maxamed Bin Raashid wuxuu waxbarashadiisa hoose, dhexe iyo sare ku dhammaystay Imaaraadka, asagoo dugsigiisa sare dhammeeyey sannadkii 1965-tii.

Sannad ka dib wuxuu u wareegay dalka Ingiriiska asaga iyo ina adeerkiis, Sheikh Mohammed bin Khalifa Al Maktoum, si uu u soo barto luuqadda Ingiriiska, wuxuuna ku biiray Iskuulka Luuqadaha ee Bell oo kuyaal Cambridge.

Markii uu dhammaystay barashada afka Ingiriisiga, wuxuu ku biiray kulliyadda ciidmaada Britain ee Munz, halkaas oo uu ka soo qaatay koorso lix bilood ah.

Maxamed bin Raashid wuxuu ka mid noqday dadkii bud dhigga u ahaa mashruucii lagu dhisay dawladda Isutagga Imaaraadka Carabta, taas oo ka koobnayd gole ay ku midaysan yihiin Imaaraadkii Carabta ee heshiiyey, waxaana xigay heshiis kii ay sannadkii 1968-dii ku midoobeen amiirkii hore ee Abu Dhabi sheikh Saayid bin Suldan iyo amiirkii hore ee Dubai Sheekh Raashid, tallaabadaas oo la oran karo waxay gogol xaar u ahayd dhismaha isutagga imaaradka.

Sannadkii 1969 ayaa Maxamed bin Raashid wuxuu madax ka noqday booliiska iyo ammaanka guud ee Imaaradda Dubai, waana xilkii dawladeed ee ugu horreeyey ee uu qabtay.

Sannadkii 1971-dii, waxaa xeebta Jumayra ee Dubai lagu saxiixay dastuurkii ugu horreeyey eek u meel gaarka ah si loo dhiso dawlad ay leeyihiin Isutagga Imaaraadka Carabtu.

Maalmihii xigayna waxaa la soo dhisay golo wasiirro oo uu madax ka ayhaay Sheekh Maktoum, wuxuuna walaalkiis u dhiibay wasiirka difaaca, wuxuuna noqday wasiirkii difaaca ee ugu da’da yaraa caalamka ee xilligaas.

Go’aanadii ugu adkaa ee uu qaatay in uu wasiiirka difaaca ahaa waxaa ka mid ahaa in ciidamo Isutagga Imaaraadka ka socda ay ka qayb qaataan xulufadii uu Maraykanku hoggaaminayey ee ciidmada Ciraaq looga saarayey dalka Kuwait sannadkii 1990-kii.

Dubai ayaa noqotay xarun ganacsi iyo mid dalxiis intii uu talada hayey Sheekh Raashid, kaas oo wiilashiisii u dhiibay mashaariic fara badan oo horumarineed.

Hawliii uu u xilsaaray wiilkiisa Maxamed waxaa ka mid ahaa in uu dhiso dekad ay doonyuhu ku xirtaan, iyo in uu madax ka noqdo guddiga madaarka Dubai ee caalamiga ah, iyo sidoo kale shirkadda shidaalka Dubai, oo loo arko isha Dhaqaalaha ugu weyn ee imaaraddaas.

Markii uu geeriyooday Sheikh Raashid sannadii 1990, waxaa xukunka kala wareegay Sheekh Maktoum.

Sannadkii 2006-dii ayaa Maxamed Bin Raashid wuxuu qabtay xukunka Imaaradda Dubai, ka dib markii oo uu dhintay walalkiis Maktoum Aala Makhtoum.

Sida uu sheegay wargayska Forbes, hantida amiirka Dubai waxay hoos ugu soo dhacday 6 bilyan oo dollar sanaddkii 2009-kii, sababo la xiriira qalalaasihii dhaqaalaha caalamka, waxaana “hantidiisa haatan lagu qiyaasaa 4 bilyan oo dollar” sida laga soo xigtay hay’adda Business Insider.

Ilhaan Cumar ayaa waxay kamid tahay wufuud xildhibaanno ah oo ay hogaamineysay afhayeenka aqalka wakiilada Mareykanka Nancy Pelosi oo booqasho ku joogo dalka Ghana.

Waftiga ka socda Aqalka Congress-ka Maraykanka oo ay horkaceyso Nancy Pelosi ayaa waxa ay kormeerayaan qalcadda Elmina, waxayna ka qeybqaadanayaan xuska 400 sanno guuradii kasoo wareegtay markii kooxdii ugu horeysay ee dadkii addoonsiga loo watay ay gaareen Maraykanka.

Madaxweynaha Somaliland Muuse Biixi ayaa doraad xafiiskiisa ku qaabilay Ergayga gaarka ah ee Somalia u qaabilsan Xoghayaha Guud ee Jimciyadda Quruumaha ka dhexaysa James Swan.

Markii kulanku dhamaaday, warsaxaafadeedka waxa ugu horeeya ee Reer Somaliland sugayeen inay ka maqlaan waxay ahayd in Soomaaliya iyo Somaliland wadahadlaan oo kala baxaan iyo in Beesha caalamka la xusuusiyo kaalintooda waajibka ah, Somaliyana lagu khasbo miiska wadahadalka ee ay diiday.

Waxaa warsaxaafadeedka mucdiisii noqday “waxaa laga wada-hadlay arrimo door ah oo ay kamid yihiin hirgelinta mashaariicda kala duwan ee hay’adaha Qaramada Midoobay ka wadaan Somaliland”, arintani waxay inoo cadeynaysaa labo arimood.

1. In Soomaaliya siyaasadii inooga adkaatay oo toodii ahayd “wadahadalku waa arin Soomaaliyeed cid na dhexgalaysaana ma jirto, gudiga aan u xilsaarnay baana ka hadlaya” ayaa la qaatay oo rabitaankii Somaliland waa la tuuray.

2. In Madaxweyne Muuse Biixi goaankiisii ahaa WAXWALIBA IYAGAA MARKAY BISLAADAAN SIDA MIDHAHA DHULKA ISAGA SOO DHACAYA oo uu iska sugaya intay dhulka ku soo dhacayso, arintan oo ah Somaliland cidi uma maqna.

Waxaa haboon in Madaxweynaha iyo xukuumadiisu gartaan inaan shacabka Somaliland u baahnay mashruuc yar oo NGO meel ka fulinayo, ee muhiimadooda koowaadna ay tahay inay Soomaaliya kala baxaan oo Dawlad la aqoonsan yahay noqdaan, Xukuumadu wixii iska soo dhaca kuma amaanid ee wixii ay qabato bay ku amaanan tahay. SOMALILAND WAXAY MAAMULGOBOLEEDYADA KAGA DUWANAYN SOMALILAND IYO SOOMAALIYA HA WADAHADLEEN.

SOMALILAND SHACABKII WANAAGSANAA EE HOGAAMINTA WAAYEY

CAQLIGA CAARRE SOO XERAYN KARI WAAYEY SOMALILAND MA MIDEYN KARAA? (TARTEENII BAAN EEDNAY)

SAFARKII GINI WUXUU KA XUN YAHAY WEERARKII TUKARAQ, CEEL-AFWEYNA WAA DHUMAY, MEEYEY CAQLIGII SOMALILAND?

Ra’iisal Wasaaraha cusub ee Ingiriiska, Boris Johnson, ma ahan qofka kaliya ee saxaafaddu ay danaynaysay markii uu jeedinayey khudbaddii uu xilka kula wareegayey, balse Carrie Symonds ayaa ah qofka kale ee aadka ay saxaafaddu isha ugu haysyay.

Symonds oo ah 31 jir ayaa saaxiib la ah Ra’iisal Wasaare Boris Johnson oo 55 jir ah, waana tan keentay in saxaafaddu ay isha ku hayso

Waa tuma Carrie Symonds?

Carrie Symonds waa gabadh uu dhalay mid ka mid ah aas aaseyaasha wargeyska The Independent.

Kaddib markii ay dhammaysatay jaamacadda Warwick oo ay ka dhigatay taariikhda iyo masraxiyadda waxay la shaqo bilowday xisbiga Conservative-ka oo ay saxaafadda u qaabilsanayd.

Sannadkii 2012-kii waxay ka mid ahayd koox u ololaynaysay Boris Johnson in mar kale loo doortay duqa magaalada London.

Kaddib markii ay la taliye u soo noqotay labo ka mid ah wasiiradda Ingiriiska, oo uu ka mid yahay Sajid Javed oo markaas wasiirka daakhiliga ahaa, ayay waxay noqotay gabadhii ugu da’da yarayd ee dhanka saxaafadda u qaabilsan xisbiga Conservative-ka.

Muddo yar kaddib markii ay soo shaac baxday in ay xidhiidh la leedahay Boris Johnson, waxay isaga tagtay shaqadeedii, oo waxay la taliye sare ka noqotay hay’ad samafalka ka shaqaysa, oo ka shaqaysa xuquuqda xayawaanka iyo deegaanka.

Barteeda ay Twitter-ka ku leedahay ayay inta badan uga hadashaa macluumaad ku saabsan dikhoowga cimilada.

Mrs Symonds ayaa sidoo kale u dhaqdhaqaaqda ka hortagga gudniinka gabdhaha.

Ma cadda markii ay isbarteen Mr Johnson iyo Symonds balse xidhiidhkooda ayaa la xaqiijiyey kadib markii ay kala tageen xaaskiisii Marina Wheeler oo ay 25 sano is qabeen afar carruur ahna ay isu dhaleen.

Ma cadda nooca uu yahay xidhiidhka ka dhexeeya Mr Johnson iyo Mrs Symonds, bishii la soo dhaafayna muran dhexdooda ah ayaa gaaray booliiska dalkaas.

Haweeney ku nool Garisa, Gobolka Waqooyi Bari ee Kenya, ayaa loo caleemo saaray in ay noqoto ugaaska beel ka mid ah beelaha halkaas dega.

Sameey Axmed Haaruun oo hadashay markii la caleema saaray kaddib waxa ay sheegtay inay haweenka reerkeeda si cadaalad ah ugu shaqeyn doonto, sidoo kalena ay caawin doonto raggii u yimaada.

Waa dhaqan ku cusub bulshada Soomaalida in haweeney ugaasnimo loo caleemo saaro. Xilka ugasnimada waxaa dhaqan ahaan Soomaalida u qabta rag.

Samey Axmed Haaruun oo BBC-da la hadashay ayaa ka warbixisay waxa ay ku dooratay xilkaan.

“Ugaasnimadayda waxay ku bilaabatay, rabitaankayga oo ahaa inaan beeshayda mideeyo, howshaan waxaan ka shaqaynaynay muddo saddex sano ah,” ayey tiri.

“Wadatashi badan ka dib waxaan istusnay in nabadgelyada iyo xalkaba uu gacanta ugu jiro dumarka oo ah hooyooyiinka dhalay ilmaha. Waa inaan walaalnimadii iyo wanaagii ka dhaxeeyey dadka la muujiyo.”

Ugaasad Samey ayaa sheegtay in howshaan ay kaalin mug leh ka gaysteen dumarka “oo lahaa fikradda iyo qaban qaabada”.

“Waxaa ra’yiga iska lahaa oo arrinkan bilaabay 20 dumar ah, waxaan wacyigelin ka dhex abuurnay bulshada. Hadda waxaan gaaraynaa illaa 500 oo xubnood. Kulamo aan yeelannay kaddib waxa ay go’aansadeen in ay isiiyaan fursad aan ugaasad uga noqdo,” Ayey Sameey u sheegtay BBC Somali.

Haddaba sidey Sameey kula shaqayntooda ugaaska beesha ay ka soo jeeda?

Xilkan cusub ee loo dhiibay Sameey lama soo wada dhoweyn. Waxaa jiro qaar ka mid ah oday dhaqameedyada isla beeshaan oo ka soo horjeeda caleemasaarkeeda.

“Dhaqan aanan lahayn ayaa lugaha noola geliyey, mana aqbaleyno arrinkan. Waxaan leennahay dhaqan soo jireen ah,” Ayuu tiri Jibril Kadiye oo isku reer ay yihiin Ugaasad Sameey.

Balse Waxay Sameey qabtaa in ay ragga kala shaqeyndoonto arrimaha bulshada, gaar ahaan wixii quseeya dumarka.

Sameey waxay tiri: “Wax dhibaato ah oo aan ka tabanayno ma jiraan ugaaska, waxaana nahay dad qaraaba ah. Marka ay dumarka dhibaato wajahaan way iikeeni karaan raggana ugaaska ayey u gayn karaan”.

“Ragga wax wey ka qaban waayeen arrimaha haweenka. Waxaan aniga ugaasad u ahay haweenka waxaan diyaar u ahay in aan si cadaalad ah dadka ugu shaqeeyo, aana u gargaaro kuwa tabaaleysan.”

Sameey ayaa haweenka u dirtay fariin waxa ayna tiri ” Midooba oo ka wada shaqeeya hormarka, raggana garabsiiya”

Masuuliyiinta Itoobiya ayaa ku rajo weyn in ay hal maalin beeraan 200 oo milyan oo geed waxayna rajaynayaan in ay taariikh cusub dhigaan.

Ra’iisal Wasaare Abiye Ahmed ayaa hormuud u ah mashruucaan oo looga golleeyahay in looga hortago nabaad guurka iyo isbadalka cimilada.

Xafiisyada dawladda qaarkood ayaa la xiray si shaqaalaha madaniga ahi ay hawshaan uga qayb qaataan.

Qaramada Midoobay ayaa sheegaysa in kaymaha Itoobiya ay baabe’een 35% guud ahaan dhulka dalkaas.

Mr Abiy ayaa daahfuay shaqada geed beerista waxayna qayb ka tahay hindisaha loo bixiyey Green Legacy Initiative, kaas oo laga qabanayo 1,000 goobood oo dalkaas ka mid ah.

Ujeedada ayaa ah in la beero afar bilyan oo geed.

Wariyaha BBC-da ee Addis Ababa, Kalkidan Yibeltal ayaa sheegaya in maalmo dhowr ah telefishinka dalkaas laga baahin doono muuqaallo dhiirri gelin ah oo dadweynaha lagu tirtirsiinayo in ay dhirta beeraan isla markaasna ay daryeelaan.

Dalkii ugu horreeyey ee hal maalin beera dhirtii ugu badnayd caalamka ayaa noqday dalka Hindiya, dalkaas ayaana 2016-dii adeegsaday 800,000 oo qof oo iskaa wax u qabso ku shaqaynayey si ay u beeraan 50 milyan oo geed.

Wasiirka tiknooliyadda iyo Hal abuurka e Itoobiya Getahun Mekuria, ayaa bartiisa twitter-ka uga hadlay halka ay hawshu marayso.

Madaxweynaha Somaliland oo si adag uga hadlay Ciidamada macno-darada loo laynayo.

Daawo:

Maxkamadda ciidamada qalabka sida ee Puntland saaka ayaa xukun adag ku riday askari ka tirsan ciidamada Badda maamulkaasi oo lagu eedeeyey inuu ka dambeeyey dilkii bishii February ee sanadkan magaalada Boosaaso loogu geystay maareeyihii shirkadda P&O Paul Anthony Farmosa.

Askarigan oo lagu magacaabo Dable Cabdi Cali Xirsi ayaa la sheegay inuu fududeeyey dilkaasi.

Maxkamadda ciidamada qalabka sida iyo dambiyada culus ee Puntland oo saaka go’aan ka gaartay kiiskan ayaa askarigaasi ku xukuntay dil toogasho ah.

Sidoo kale waxay maxkamaddu shaacisay in eedeysanaha uu weli heysto racfaan uu ku qaadan karo muddo bil ah.

Xukunka askarigan ayaa lagu soo aadiyey, iyadoo ay dhawaan Puntland shaacisay inay ku dhawaaqeyso baaritaanka dilkii Paul Anthony Farmosa.

“Dowladda Puntland waxay si buuxda ula shaqeyneysa geedi u socod kasta oo baaritaan lagu sameynayo, waxayna dhowaan baahineysaa fahfaahinta baaritaanka gaarka ah ee dilka maamulihii P&O.” ayaa lagu yiri qoraal horay uga soo baxay Puntland.

Arrintan ayaa soo ifbaxday, kadib markii uu dhawaan wargeyska New York Times shaaciyey in Qatar ay ku lug laheyd qarax iyo dil ka dhacay bishii May ee sanadkan gudaha  magaalada Boosaaso ee xarunta gobolka Bari.

WAREEGTO MADAXWEYNE 29/07/2019

Madaxweynaha Jamhuuriyadda Somaliland, Mudane Muuse Biixi Cabdi waxa uu wareegto madaxweyne oo summadeedu tahay JSL/XM/XKQ/222/1-351/072019, uu Xilka qaadis iyo Magacaabid ku sameeyey xubno ka mida xukuumadda.

Waxaanay u dhignayd Wareegtada Madaxweynuhu Sidan:-

Ujeeddo: Xil Ka-qaadis

Ku: Maxamed Daahir Axmed Furre;
Wasiir Ku-xigeenkii Wasaaradda Waxbarashada iyo Sayniska

Ku: Cismaan Sheekh Cabdi Sheekh Maxamed Kaahin;
Maareeyihii Hay’adda Waddooyinka

Ku: Cabdi Nuur Sugaal;
Guddoomiye Ku-xigeenkii Gobolka Awdal

Ku: Naasir Ayjeex Jaamac;
Agaasimihii Fulinta Komishanka Qaranka ee Xakamaynta AIDS-ka

Ku: Maxamed Abiib Yuusuf;
Agaasimihii Daaweynta iyo Daryeelka ee Komishanka Xakamaynta AIDS-ka

Mudanayaal,

Sida aad la socotaan, xilka qaranka ayey sunnihiisa tahay in uu meerto noqdo, oo loo igmado hadba ciddii hanan karta. Sidaa darteed, waxaan gartay in laga bilaabo taariikhda maanta aan idinka qaado xilalka aad hayseen ee kor ku xusan:

Waxaan idiinka mahadcelinayaa muddadii aad hayseen xilalkaas Qaran.

UJEEDO : MAGACAABID

Markaan Arkay: Dastuurka Jamhuuriyadda Somaliland, Qodobka 90aad;

Markaan Arkay: Aqoontooda, Kartidooda iyo Waaya-aragnimadooda;

Markaan ku Qancay: In ay Hanan Karaan Masuuliyadda ka Dhalanaysa Xilalkan;

Markaan Sameeyey: La-tashi Ballaadhan;

Waxaan Go’aamiyey;

In laga bilaabo taariikhda maanta aan masuuliyiintan u magacaabo xilalkan:

1. Axmed Xasan Nuur (Axmed Taajir) Wasiir Ku-xigeenka Wasaaradda Waxbarashada iyo Sayniska

2. Axmed Yuusuf Maxamed Maareeyaha Hay’adda Waddooyinka Somaliland

3. Cabdishakhuur Ismaaciil Muumin Aar Agaasimaha Fulinta Komishanka Xakamaynta AIDS-ka

4. Maxamuud Ismaaciil Cilmi Agaasimaha Guud ee Hay’adda Duulista iyo Madaarada

5. Xamse Suldaan Aadan Faarax Agaasimaha Guud ee Hay’adda Shaqaalaha Dawladda

6. Cawaale Faarax Cilmi Badhasaab Ku-xigeenka Gobolka Awdal

7. Diiriye Cabdi Jaamac Xubin ka tirsan Guddida Qandaraasyada Qaranka

8. Sahra Maxamed Xuseen Agaasimaha Daaweynta iyo Daryeelka Komishanka Xakamaynta AIDS-ka

ALLAA MAHAD LEH 
Muuse Biixi Cabdi
Madaxweynaha JSL.