Waxaa la shaaciyay aqoonsiga ninkii lagu eedeeyay in uu toogashada ku dilay taliyihii guud ee ciidammada dalka Itoobiya jeneraal Seare Mekonnen iyo jeneraalka kale.

Labadaas nin ayaa Addis Ababa lagu dilay Sabtidii, iyadoo ay arrintaas dawladdu ku tilmaantay in ay qayb ka ahayd iskudaygii afgambi ee la sheegay in uu ka dhacay gobolka Amxaarada.

Axaddii ayay Dawladda Itoobiya sheegtay in dilka jeneraalka uu masuul ka ahaa waardiyihiisa, xabsi ayayna dhigtay.

Isniintii ayuu Endeshaw Tasew oo ah taliye booliis sheegay in waardiyihii dilka gaystay uu isna is dilay ka dib markii uu jeneraalka khaarajiyay.

Intaas ka dibna booliiska faderaalka ayaa raali galin bixiyay oo sheegay in waardiyuhu uu ku jiro isbitaal kana soo kabanayo dhaawacyo rasaas ka soo gaaray.

Telefeshinka dawladda ee ETV ayaa waardiyaha magaciisa ku sheegay Labo Alifle Mesafint Tigabu. Telefeshinka ayaana soo bandhigay sawirkiisa.

Labo Alifle Mesafint ayaa wali lagu dabiibayaa isbitaal, gaar ahaan qaybta la dhigo dadka aadka u liita isaga oo ammaankiisa aad loo sugayo, sida uu sheegay telefeshinka ETV.

Eric Trump oo ah wiil uu dhalay Madaxweynaha Mareykanka, Donald Trump ayaa sheegay in uu candhuuf ku tufay qof shaqaale ah oo ka shaqeeya baar lagu magacaabo Chicago cocktail bar.

“Runtii waxay ahayd ficil uu sameeyay qof qiireysan, waana arrin laga yaqyaqsado”, Sidaas waxaa yiri Eric Trump oo la hadlayay mid kamid ah warbaahinta Mareykanka.

Warbaahinta maxaliga ee dalkaas ayaa kusoo warramayay in laamaha ammaanka ay su\’aalo weydiiyeen qofka shaqaalaha ee sidaas sameeyay, inkastoo markii dambe la fasaxay.

Baarka ayaa xaqiijiyay in arrin “nasiib darro” ah ay dhacday, xili uu wilka Trump ku sugnaa dhismaha baarkaas lagu caweeyo. “Ma aanan joogin xiliga ay wax dhaceen, balse waxaan isku dayeenaa in aan ogaano sida ay wax u dhaceen”, ayaa lagu yiri war qoraal ah oo ay soo saareen maamulka Baarka.

Waxay intaa raaciyeen in uusan jirin qof macamiil ah oo mudan in candhuuf lagu tufo. Eric ayaa sheegay in uusan wax dacwad ah u qabsan qofka sidaas sameeyay oo haatan si kooban shaqada looga joojiyay.

Afhayeen u hadlay booliska Chicago ayaa barta Twitter-ka ku sheegay in arrintaas lagu soo wargeliyay. Xiliga arrinta ay dhacday oo ku beegneyd 20:30 fiidnimo.

Wiilka Trump oo maamula hay’adda Trump Organisation ayaa xiligaas ku sugnaa huteel uu aabihii ku leeyahay magaalada Chicago, wuxuuna sheegay in arrinta isaga ku dhacday ay ahayd mid siyaasadeysan.

“Waxay taasi muujineysaa ilbaxnimo tan ugu liidato, ayna tusaale u tahay in aan guuleysanay”, Ayuu raaciyay Eric.

Waxaa kale oo uu sheegay in qofkaas uu ahaa qof aaminsan siyaasadha xisbiga Dimuqraadiga ee dalka Mareykanka oo loollan adag ku haya xisbiga tallada haya.

Candhuufta lagu tufay wiilka Trump ayaa qeyb ka ah dhacdooyin is xigxigay oo ay la kulmayeen kooxda Trump, taas oo ku saleysan kala duwanaashaha dhanka siyaasadda Mareykanka.

Sidoo kale bishii Juunyo ee sanadkan ayaa waxaa lagu ooriyay nin xiligaas ka tirsanaa wasaaaradda amniga ee Mareykanka, waxaana maalin kadib xoghayihii saxaafadda ee Mareykanka Sarah Sanders lagu amray inay ka baxdo huteel ku yaala gobolka Virginia, maadaama ay katirsaneyd xukuumadda Trump.

Faahfaahin dheeraad ah ayaa ka soo baxaysa wiiil kale oo Soomaali ah oo dhalinyaro ah ah oo habeenimadii xalay lagu diley xaafadda Shepherd’s Bush, ee degmada Hammersmith ee Galbeedka magaalada London.

Wiilkan oo da’diisa aheyd 18 jir, ayaa magaciisa lagu sheegay Yuusuf Maxamed, ayaa isagoo dhaawac ah waxaa laga helay dukaan ku yaal wadadda Uxbridge oo uu ku cararay markii tooreyda lagu dhuftay, iyadoo isla markiiba goobta ay soo gaareen booliiska iyo kooxaha gurmadka deg deg ah oo ay ka mid yihiin diyaaradaha khumaatiga u kaca gaar ahaan kuwa Ambulance ah.

Dad goobjogaayaal ah oo ka gaabsaday in magacooda la xuso ayaa saxaafada u sheegay in Yuusuf intii aan la dilin ka hor uu isku dayay in uu labadii nin ee dilka u geysatey uu tuso aanu wax hub ah wadan, isagoo gacmaha kor u taagey, waxaase markiiba toorey lagaga dhuftay xabadka, markii uu gudaha dukaanka galay ayaa laba mar oo kale minddida la galiyey, iyadoo goobtii ay ka carareen ragii dilka geystey.

Cabdulaahi Culusow oo 62 sano jir ah, ahna Yuusuf Aabihiis, ayaa ku tilmaamay dilka wiilkiisa naxdin iyo qarracan, wuxuu sheegay Yuusuf uu ahaa wiil wanaagsan oo Koleej dhiganayey isla markaana doonayey in uu noqdo Injineer.

Qof goob jooge ah ayaa sheegay in wiilka la dilay lagu eryaday goob tukaan ah.

“Waxaan imid UK 20 sano ka hor, si aan u helo nolol wanaagsan iyo amni, laakiin London waxay noqotay bahallo galeen, maalin kasta waalidiintu waxay waynayaan ilmahoodii” ayuu yiri Cabdulaahi, oo sidoo kale Booliiska ka dalbaday in ay soo qabtaan kuwii ka dambeeyey dilka wiilkiisa inta aanay dillin buu yiri wiil kale.

“Halkan (UK) ayuu ku dhashay, wuxuu ahaa wiil la jecel yahay, waynu argagaxsanahay, waana wax aan la qaadan Karin” ayuu yiri Cabdulaahi.

Saaxiibada Yuusuf ayaa sheegay in uu ahaa nin dabeecad wanaagsan oo furfuran, isagoo taageere u ahaa kooxda Chelsea ee ka dhisan xaafadda Fulham ee uu ku dhashay.

Booliisku waxay kaloo codsadeen in ciddii wax ka og sidii uu weerarkaasi u dhacay ama ka agdhaweyd goobta ay la soo xiriirraan si ay u caawiso baaritaankooda.

Dilkan xalay dhacay ayaa ah kii ugu dambeeyey mowjado dilal iyo qulqulatooyin intooda badan u dhaxeeyaan dhalinyaro koox koox isku baacsanaysa gudaha magaalada London, kuwaasi oo shan qof siyaabo kala duwan loogu dilay lixdii maalmood ka hor.

Qaar kamid ah dhalinyarada soomaalida ee ku nool magaalada London ayaa waxay la kulmeen mowjado weerarro ah oo loo adeegsaday minddiyo taas oo saameysay guud ahaan soomaalida ku nool London.